tatar-inform.ru сайти фотосурати
Андижон вилояти Марҳамат тумани суди маҳаллий фуқаро Фурқатбек Ҳасановни Россия томонидан Украина ҳудудида ўтказилаётган махсус ҳарбий операцияда (МҲО) иштирок этиш учун ватандошларни жалб қилишга уринишда айбдор деб топиб, етти йилу бир ой муддатга озодликдан маҳрум қилди. Бу ҳақда жиноят иши материалларига асосланиб Kun.uz хабар берди.
Қайд этилишича, Хасанов ўзини «Дмитрий Робертович» деб таништирган РФ фуқароси билан тил бириктирган. Ўзбекистон фуқароси, ўзининг тан олишича, шериги билан бир неча йил аввал Россияда тиш пастаси ишлаб чиқарувчи заводда ишлаётганида танишган. 2023 йил декабр ойи ўрталарида Дмитрий Робертович WhatsApp орқали қўнғироқ қилиб, Россия ва Украина ўртасида қуроллари тўқнашувлар бўлган ҳудудларга бориб нон ёпишни ёки қурилиш ишларида ишлаш мумкинлигини маълум қилган. Ҳасанов унга Россияга боришга депортациям борлигини, бошқа Ўзбекистон фуқароларини топиб, уларни ишга жалб қилиши мумкинлигини айтган. Бундай хизматлар учун рус воситачиси ҳар бир ишга ёлланган одам учун 400 дан 1000 долларгача тўлашини айтган.
Ҳасанов ўз ватанида такси ҳайдовчиси бўлиб ишлаган. Шу билан бирга, у баъзи йўловчиларга Россияда яхши иш борлигини, ҳеч қандай харажати йўқлигини, Россия ва Украина ўртасида уруш бўлиб ўтган жойларда тозалов, атрофни қўриқлаш ишлари бўлишини, ҳарбий кийим, қурол ва офицер унвони тақдим этилишини, 6 ойга шартнома тузилишини, ойига 2500-3000 доллар ойлик ҳамда турли имтиёзлар берилишини, хусусан, Россия фуқаролигини олишлари ҳам мумкинлигини айтган.
Андижонлик таксичининг таклифига айрим одамлар қизиқиб қолади. Хусусан, Ҳасанов «мижоз»лардан бири учун Россияга авиачипта сотиб олиб, йигитни жўнатмоқчи бўлади, бироқ иккаласи Фарғона аэропортида қўлга олинади.
Суд жараёнида андижонлик қилмишидан пушаймон бўлган. У бундай хатти-ҳаракатлар жиноят эканини англамаганини айтган.
Шунга қарамай, Ҳасанов Ўзбекистон Жиноят кодексининг 25-моддаси («Жиноятга тайёргарлик кўриш ва жиноятга суиқасд қилиш») ва 154-моддаси 2-қисми («Ёллаш») билан айбдор деб топилди. У етти йилу бир ой қамоқ жазосига ҳукм қилинди.
