Қорадарё. waterresources.ru сайти фотосурати
Ўзбекистон Инвестициялар, саноат ва савдо вазирлиги (ИССВ) Хитойнинг Xinjiang Qianyuan Kunyu Construction Engineering компанияси билан Андижон вилоятида тўққизта мини ГЭС қуриш бўйича шартнома имзолади. Бу ҳақда ИССВ матбуот хизмати ўзининг Телеграм-каналида маълум қилди.
Вазирлик вакиллари Тошкентда бўлиб ўтган йиғилишда Хитой компанияси раҳбарияти билан Марказий Осиё республикаси сув йўлларида кичик гидроэлектр станциялар каскадларини қуриш бўйича техник тафсилотлар ва келгусидаги қадамларни атрофлича муҳокама қилган.
Музокаралар якунида томонлар Андижон вилоятидаги Қорадарёда тўққизта мини ГЭС қуриш лойиҳасини амалга ошириш бўйича инвестиция шартномасини имзолаганлар. Амалга ошириладиган ишларнинг нархи, шунингдек, объектларни ишга тушириш муддатлари ошкор этилмаган.
ИССВ маълумотларига кўра, Xinjiang Qianyuan Kunyu Construction Engineering компанияси 2011 йили ташкил этилган. Компания электр узатиш ва тақсимлаш тизимларини қуриш, қайта тикланадиган энергия манбалари соҳасидаги лойиҳаларни ишлаб чиқиш, сармоя киритиш ва бошқариш билан шуғулланади.
8 апрель куни ИССВ Хитой корпорациялари билан Ўзбекистонда шамол ва қуёш электр станцияларини қуриш бўйича келишувга эришгани хабар қилинган эди. Биринчи ҳолда, Sany Renewables International Investment компанияси Қорақалпоғистонда 1000 МВт қувватга эга объектни қуради.
China Electrical Equipment International компанияси билан тузилган яна бир шартномага кўра, Хитой инвесторлари Жиззах вилоятининг Фориш туманида 500 МВт қувватга эга қуёш электр станциясини қуради.
ℹ️ Қорадарё — Ўзбекистоннинг Андижон ва Наманган вилоятлари ҳамда Қирғизистоннинг Ўш вилояти ҳудудидан оқиб ўтувчи дарё. Сирдарёга қуйиладиган энг йирик дарёлардан бири.
