zarnews.uz сайти фотосурати
Самарқанд вилояти Пастдарғом туман суди Россия армияси билан шартнома имзолаган 51 ёшли Ўзбекистон фуқароси T.Р.ни ёлланиш моддаси бўйича айбдор деб топди. Мазкур иш бўйича айбланувчи тўрт йилга эркинликни чеклаш жазосига маҳрум этилди, деб ёзади UzNews.uz суд қарорига таяниб.
Тергов материалларига кўра, Т.Р. 2021 йили ишлаш учун Санкт-Петербургга жўнаб кетган. 2024 йил январь ойида у Россия полицияси томонидан мамлакатда яшаш қоидаларини бузгани учун ҳибсга олинган. Айбланувчининг сўзларига кўра, у тергов изоляторида бўлганида, Ички ишлар вазирлиги ходимлари Украина ҳудудида махсус ҳарбий операцияда қатнашиш учун Қуролли Кучлар сафига қўшилишни таклиф қилишган. Чет элликка катта миқдорда пул мукофоти ва Россия фуқаролиги ваъда қилинган. «Чорасиз» қолган ўзбекистонлик бу шартларга рози бўлган ва бир йил муддатга ҳарбий хизматни ўташ шартномасини имзолаган.
Айбланувчининг сўзларига кўра, у Ленинград вилояти Виборг туманидаги Каменка қишлоғида барпо этилган мудофаа истеҳкомлари қурилиши билан шуғулланган. Ўтган йил июль ойида Ўзбекистон фуқароси иккита пул ўтказмасини олган: 195 минг (2400 доллар) ва 500 минг рубль (6200 доллар). Шундан сўнг унга 37 минг рубль (460 доллар) миқдорида ойлик маош тайинланган.
Хизмат вақтида мигрантнинг қорнида оғриқлар пайдо бўла бошлаган, шу сабабдан у октябрь ойида ҳарбий қисмнинг тиббиёт бўлимига ётқизилган. Кейин уни Краснодар ўлкасидаги ҳарбий санаторийга юборишган. У ерда Т.Р. шу йил бошига қадар бўлган ва 10 январь куни Ўзбекистонга қайтган. Унинг ватанида шартнома бўйича ҳарбий хизматчига нисбатан республика Жиноят кодексининг 154-моддаси 1-қисми («Ёлланиш») билан иш очилган.
Суд жараёнида айбланувчи тавба қилган, енгилроқ жазо тайинлашларини сўраган. Натижада унга тўрт йил муддатга озодликни чеклаш жазоси берилган.
