Хоккей бўйича Қозоғистон терма жамоаси. IIHF сурати
Хоккей бўйича Қозоғистон эркаклар терма жамоаси 8 ноябрь куни Жанубий Кореянинг Чонжу шаҳрида якунланган Осиё чемпионатида кетма-кет учинчи бор ғолибликни қўлга киритди. Ҳал қилувчи баҳсда Талғат Жайлауов шогирдлари мусобақа мезбонларини буллитлар сериясида мағлуб этди.
Жанубий Кореяга қарши учрашувнинг асосий ва қўшимча вақтида шайба киритилмади — 0:0. Буллитлар сериясида эса қозоғистонликлар аниқроқ ҳаракат қилишди — 4:3. Ғалаба келтирган зарбани Диас Гусейнов амалга оширди. Шунингдек, Артур Гросс ва икки бор ажралиб турган Евгений Римарев ҳам ўз имкониятларидан унумли фойдаланди. Дарвозабон Владислав Нурек 65 дақиқалик ўйин давомида (асосий вақт ва овертайм) ўз дарвозаси дахлсизлигини сақлаб қолди.
Бундан аввал Қозоғистон терма жамоаси Японияни 3:2 ҳисобида мағлуб этган ва Хитойни 5:0 ҳисобида тор-мор келтирган эди. Учта учрашувда учта ғалабага эришган жамоа саккиз очко жамғариб, якуний жадвалда биринчи ўринни эгаллади. Олти очко тўплаган Япония кумуш, тўрт очкога эга Жанубий Корея эса бронза медалларига сазовор бўлди. Хитой турнирни очкосиз якунлади.
Қозоғистон Халқаро хоккей федерацияси (IIHF) шафелигида ўтказилган ҳар учала Осиё чемпионатида ҳам бош совринни қўлга киритди. Биринчи турнир 2024 йили Олмаотада, иккинчиси эса 2025 йили Пекинда бўлиб ўтган эди. Ҳозирча мусобақада фақат тўртта терма жамоа — Қозоғистон, Япония, Жанубий Корея ва Хитой иштирок этмоқда. Улар бир даврали тизимда баҳс олиб бориб, ғолиб жамғарилган очколар сонига кўра аниқланади.
2026 йилнинг май ойида Қозоғистон терма жамоаси IA дивизионидаги жаҳон чемпионатида ҳам бешта баҳсда бешта ғалаба қозониб, 2027 йилда жаҳон биринчилигининг элита дивизионига қайтиш ҳуқуқини қўлга киритган эди.
