Судя Апелляция комиссияси қарорини ўқиб эшиттирмоқда. Ўзбекистон Олий суди матбуот хизмати фотосурати
Ўзбекистон Олий суди (ОС) Жиноят ишлари бўйича судлов ҳайъати «Нукус иши» бўйича 16 нафар судланувчининг шикоятларини кўриб чиқишни якунлади. Улардан саккиз нафарининг жазоси енгиллаштирилиб, озодликка чиқарилди, бироқ асосий айбланувчи, адвокат ва журналист Даулетмурат Тожимуратовнинг ҳукми ўзгаришсиз қолдирилди. Бу ҳақда Олий суд матбуот хизмати ўзининг Телеграм-каналида хабар берди.
Жиноят кодексининг қатор моддалари, жумладан оммавий тартибсизликлар уюштирганлик ва ҳокимиятни эгаллашга уринганлик учун 16 йилга озодликдан маҳрум этилган Тожимуратовга нисбатан ҳукм апелляция суди томонидан ўзгаришсиз қолдирилган ягона шахс бўлди.
Биринчи инстанция суди томонидан 3 йилдан 8 йилгача озодликдан маҳрум этилган саккиз нафар айбланувчининг жазоси озодликни чеклаш билан алмаштирилди. Ва кўп ҳолларда қисқароқ муддатга. Айбланувчилар суд залида озод қилинди. Мана уларнинг исмлари:
✔️ Бахтияр Қодирбергенов;
✔️ Байрам Сеитниязов;
✔️ Саидабулла Медетов;
✔️ Қаҳарман Сейитимов;
✔️ Пўлат Нурниязов;
✔️ Саийпназар Калимов;
✔️ Нурлан Султонмуратов;
✔️ Арсиланбек Темирхонов.
Озодлик чекланиши шартларига кўра, улар тунги вақтда уйдан чиқмасликлари, оммавий тадбирларда иштирок этишлари тақиқланади ва пробация органларига мунтазам равишда ҳисобот беришлари шарт.
Аввалроқ прокуратура юқоридаги жараён иштирокчиларининг барчаси ўз айбларига иқрор бўлиб, пушаймон бўлганини, шунингдек, президент ва халқдан кечирим сўраганини билдирган эди.
«Нукус иши» бўйича яна олти нафар судланувчининг жазо муддати қисқартирилди: Даулетмурат Жимуратов, Амирбек Адилбеков ва Разбек Бекмуратовнинг жазо муддати икки йилга, Нурлан Найипов, Султонбек Каипов, Аллабай Токимбетовнинг жазо муддати уч йилга қисқартирилди.
Шунингдек, Апелляция суди ҳукм эълон қилинганидан кўп ўтмай қамоқда вафот этган Пўлат Шамшетовнинг ҳуқуқларини тиклаш ва мулкини меросхўрларига қайтариш тўғрисида қарор чиқарди.
Шу билан бирга, суд Лолагул Каллиханова, Азамат Турданов, Ахмет Сметуллаев ва Азамат Нуратдиновга нисбатан прокуратура протести кўриб чиқилди. Айблов томони уларга озодликни чеклаш ва шартли жазо ўрнига озодликдан маҳрум этиш жазосини беришни талаб қилганди. Натижада суд ушбу протестни рад этиб, биринчи инстанция ҳукмини ўзгаришсиз қолдирди.
2 июнь куни Апелляция суди мажлисида Даулетмурат Тажимуратовнинг адвокати ҳимояси остидаги шахснинг суд жараёни сиёсий характерга эга экани ҳақида баёнот берди.
Судланувчининг ўзи сўнгги сўзида айбини тан олмай, Ўзбекистон президенти Шавкат Мирзиёевнинг душмани эмаслигини қўшимча қилган. Бундан ташқари, Тажимуратов ўтган йилнинг 1-2 июль кунлари Қорақалпоғистонда халқ ғалаёнига сабаб бўлган Конституцияга киритилган ўзгартишларни яратган шахсларнинг исмларини ҳам айтиб ўтган. Бу рўйхатга депутатлар, сенатор ва Қорақалпоғистон Республикаси мутасаддилари, жумладан республика Адлия вазири ва Нукус шаҳри ҳокими киради.
Тожимуратов ўтган йил ёздаги фожиали воқеалардан кейин депутатларнинг ҳеч бири жавобгарликка тортилмагани, барча айб биргина унга юкланганини таъкидлаган.
Эслатиб ўтамиз, 43 ёшли Даулетмурат Тажимуратов 2022 йил 1-2-июль кунлари Қорақалпоғистонда содир бўлган воқеалар бўйича биринчи суд жараёнида иштирок этган асосий шахс бўлди. Ўшанда Нукусда Ўзбекистон Конституциясига республика суверенитетидан маҳрум қилишни назарда тутувчи ўзгартиришлар киритилишига қарши намойишлар бўлиб ўтганди. Тартибсизликлар чоғида, расмий маълумотларга кўра, 21 киши ҳалок бўлган, 300 га яқин киши, жумладан ҳуқуқ-тартибот идоралари ходимлари ва ҳарбийлар яраланган. Етказилган моддий зарар миқдори 6,6 миллиард сўмдан ортиқни (596 минг доллардан ортиқ) ташкил этган.
Ҳукмлар шу йилнинг 31 январида эълон қилинди. Тожимуратов Жиноят кодексининг беш моддаси билан айбдор деб топилиб, 16 йилга озодликдан маҳрум этилди.
