Қозоғистон нефтини Каспий қувурлари консорциуми (КҚК) орқали экспорт қилиш ҳажми июль ойида Қора денгиз терминали ҳудудида дронлар ҳужумлари кўпайгани сабаб дастлабки режага нисбатан 20 фоиздан ортиққа камайган. Бу ҳақда соҳадаги манбалар ва Kpler таҳлил компаниясига таяниб, Reuters хабар берди.
Агентлик манбалари маълумотига кўра, июль ойида КҚК орқали кунига тахминан 1,2–1,3 миллион баррель нефть экспорт қилинган. Одатий шароитда эса бу кўрсаткич кунига 1,6–1,7 миллион баррелни ташкил этади.
Манбаларнинг билдиришича, 7 август, жума куни Новороссийск яқинидаги Южная Озереевка ҳудудида жойлашган КҚК терминалида нефть ортиш ишлари бир кун аввал қисқа муддатга қайта тикланганидан сўнг яна тўхтатилган.
Kpler баҳосига кўра, август ойининг бошида CPC Blend навли нефть юклаш ҳажми ўртача кунига 1,1–1,2 миллион баррелни ташкил этмоқда. Бу ҳам одатий даражадан анча паст ҳисобланади.
КҚК вакиллари июль ва август ойларидаги экспорт ҳажмлари ҳақида изоҳ беришдан бош тортган.
Консорциумнинг қувур тизими орқали Қозоғистон нефти экспортининг 80 фоиздан ортиғи, жумладан, Тенгиз, Қашаған ва Қорачиғaноқ каби йирик конлардан олинаётган нефть ташилади. Таъминотдаги узилишлар фонида Қозоғистон июль ойида нефть қазиб чиқариш ҳажмини июнь ойига нисбатан 14 фоизга қисқартирган эди.
Шу билан бирга, «ҚозМунайГаз» бошқаруви раиси Асхат Ҳасеновнинг таъкидлашича, ҳозирги кунда Қозоғистон учун иқтисодий самарадорлик ва нефть ташиш ҳажми бўйича Қаспий қувурлари консорциумига тўлиқ муқобил йўналиш мавжуд эмас.
«Бугунги кунда Қаспий қувурлари консорциумига иқтисодий жиҳатдан ҳам, ҳажмлар бўйича ҳам муқобил йўқ. Аммо бу бошқа йўналишларни ишлаб чиқмаяпмиз дегани эмас. Уларнинг барчаси устида иш олиб борилмоқда», — деди Ҳасенов.
Унинг маълумотига кўра, 2025 йилда КҚК тизими орқали 64,8 миллион тонна нефть ташилган, 2026 йил учун эса режа 65 миллион тоннани ташкил этади. Қаспий қувур консорциуми акциядорлари қуйидагилардан иборат: Россия — 31 фоиз, Қозоғистон — 20,75 фоиз, АҚШнинг Chevron компанияси — 15 фоиз, шунингдек, яна бир қатор хусусий компаниялар.
