Қозоғистон Қурултойи (парламенти) депутатлари 31 август куни Ерлан Каринни мамлакат вице-президенти, Олжас Бектеновни эса Бош вазир лавозимига тайинлашга розилик берди. Шундан сўнг президент Қосим-Жомарт Тўқаев ҳар икки сиёсатчини ушбу лавозимларга тайинлаш тўғрисидаги фармонларни имзолади. Номзодларнинг иккаласини ҳам давлат раҳбари таклиф қилган, деб хабар беради Aqorda.
Вице-президент лавозими 2026 йил 15 март куни референдумда қабул қилинган Қозоғистоннинг янги Конституцияси асосида жорий этилди. Асосий қонунга кўра, вице-президент давлат раҳбари томонидан Қурултой аъзоларининг розилиги билан тайинланади.
Вице-президентнинг ваколатларига президентнинг парламент, ҳукумат ва бошқа давлат органлари билан ўзаро муносабатларида унинг номидан иш юритиш, шунингдек, президент топшириқларини бажариш киради. Давлат раҳбарининг ваколатлари муддатидан олдин тугатилган тақдирда, президент ваколатларини қабул қилиш навбатида биринчи ўринда вице-президент туради.
ℹ️ Ерлан Карин 1976 йил 26 майда Туркистон вилояти Сайрам туманидаги Оқсув қишлоғида туғилган. 1996 йилда К. Жубанов номидаги Ақтўбе университетини «тарих ва география» мутахассислиги бўйича тамомлаб, ўқитувчи малакасига эга бўлган. 1999 йилда ал-Фаробий номидаги Қозоғистон миллий университети фалсафа ва сиёсатшунослик факультетининг аспирантурасини тамомлаган. Сиёсий фанлар номзоди.
Ўқитувчи бўлиб ишлаган, Марказий Осиё сиёсий тадқиқотлар агентлигини бошқарган, Бош вазир маслаҳатчиси бўлган. Турли йилларда «Асар» партиясида, Президент маъмуриятида, «Nur Otan» партиясида стратегик ривожланиш бўйича котиб лавозимида ишлаган, Президент ҳузуридаги Қозоғистон стратегик тадқиқотлар институти (ҚСТИ) директори, «ҚТРК «Қозоғистон»» раиси лавозимларида фаолият юритган.
2019–2022 йилларда президент маслаҳатчиси ва ёрдамчиси бўлиб ишлаган. 2022 йил 5 январдан давлат котиби, кейинчалик Қозоғистон давлат маслаҳатчиси лавозимларида фаолият юритган. 2026 йил 30 июндан Президент администрацияси раҳбарининг биринчи ўринбосари лавозимида ишлаб келган.
ℹ️ Олжас Бектенов 1980 йил 13 декабрда Олмаотада туғилган. 2001 йилда Қозоғистон давлат юридик академиясини «юрист» мутахассислиги бўйича имтиёзли диплом билан тамомлаган. Бош вазир канцелярияси, Президент администрацияси, Адлия вазирлиги ва молия полициясида ишлаган. Остона шаҳри ҳокими аппаратига раҳбарлик қилган, Остона бўйича Коррупцияга қарши кураш агентлиги департаментини бошқарган, Ақмола вилояти ҳокими ўринбосари бўлган.
2018 йил июлидан 2023 йил апрелигача Коррупцияга қарши кураш агентлиги тизимида турли лавозимларда ишлаган, шундан сўнг Президент администрацияси раҳбари этиб тайинланган. 2024 йил 6 февралда Қозоғистон Бош вазири лавозимига тайинланган.
